Fréttir

Nemendur í 7. bekk settu í dag upp jólatréð á sal skólans eins og hefð er fyrir. Mikil gleði var hjá nemendum og var samvinna hjá þeim til fyrirmyndar.

Kæru foreldrar og forráðamenn. Við höldum áfram með óbreytt skipulag til 9. desember. Allar sömu sóttvarnaraðgerðir, hólfaskiptingar og takmarkanir og verið hafa undanfarið. Áfram við öll! Stjórnendur Sandgerðisskóla

Í dag var kveikt á jólatrénu við Sandgerðisskóla. Vegna þeirra fjöldatakmarkanna sem er í gildi var ekki hefðbundin fjölskylduskemmtun að kvöldi til eins og fyrri ár, heldur var hátíðleg athöfn haldin með nemendum í 1. - 7. bekk í byrjun skóladags. Magnús Stefánsson, bæjarstjóri ávarpaði nemendur og fékk til sín yngsta nemanda skólans, Arnar Snæ Helgason til að kveikja á jólatrénu. Í framhaldi mættu bræðurnir, Friðrik Dór- og Jón Jónssynir og skemmtu nemendum. Vegna fjöldatakmarkanna var skemmtunin tekin upp og sýnd nemendum á unglingastigi í þeirra heimastofum. Allir nemendur skólans fengu mandarínu og nammipoka í boði Suðurnesjabæjar.

Nemendur í 6. bekk unnu með Barnasáttmálann í síðustu viku í tilefni af Degi mannréttinda barna þann 20. nóvember sl. Við horfðum á Línu langsokk og ræddum saman hvernig væri ekki verið að virða barnasáttmálann í þeirri mynd. Út frá því ræddum við hver réttindi barnanna í skólanum okkar séu. Síðan gerðum við veggspjald sem heitir Barnasáttmálinn okkar.

Í dag fimmtudaginn 26. nóvember er útlit fyrir slæmt veður upp úr hádegi. Við minnum á að skólinn er öruggt skjól fyrir börnin en mikilvægt að foreldrar geri ráðstafanir, að börn verði sótt í skólann eða Skólasel þegar skóladegi lýkur, fyrr eða síðar ef það hentar betur. Símanúmer skólans er 425-3100 / Netföng: grunnskoli@sandgerdisskoli.is / ritari@sandgerdisskoli.is

Í vikunni fengu allir nemendur skólans endurskinsmerki að gjöf frá Björgunarsveitinni Sigurvon og ættu því að vera vel upplýstir í skammdeginu. Eins og sjá má á þeim myndum sem teknar voru við þetta tækifæri voru nemendur ánægðir með gjöfina og þakka björgunarsveitinni kærlega fyrir sig.

1.-4. bekk verður kennt skv. stundatöflu, þ.m.t. íþróttir, sund, verk- og listgreinar og frístund að skóla loknum til 16:00 fyrir þá sem þar eru. 5.-7. bekk verður kennt samkvæmt stundatöflum þ.m.t. íþróttir, sund, verkval og verk- og listgreinar með örlitlum breytingum, töflur þess efnis koma til þeirra sem það á við. 8.- 9. bekkur verður kennt samkvæmt töflu til 12:25 og þar verða áfram takmarkanir. 10. bekk verður kennt samkvæmt töflu til 12:45 og þar verða áfram takmarkanir.

4. bekkur nýtir hvert tækifæri þessa dagana til útiveru og að fræðast um nærumhverfið sitt. Í útiveru dagsins fengu allir nemendur endurskinsmerki frá Björgunarsveitinni Sigurvon, allir ættu því að sjást vel í göngutúrunum okkar. Við fórum yfir hvernig samspil sólar og jarðarinnar hafa áhrif á sólarganginn og að nú styttist í vetrarsólstöður og þá fer dagurinn að lengjast á ný. Framtíðar náttúrufræðingar fræddust um minkinn í fjörunni og væntanlegir eðlisfræðingar fleyttu kerlingar til að kanna stærð og stefnu krafts.

Kæru foreldrar og forráðamenn. Næstu tvær vikurnar verður skólastarf nánast óbreytt frá því sem verið hefur undanfarnar vikur, það er skert stundatafla. Stundartöflur skerts skólastarfs halda sér sem og frístund þó munu nemendur á yngsta- og miðstigi nú fara í matsal og borða og grímuskylda þeirra fellur niður, þá mega þau einnig vera í breytilegum hópum svo lengi sem þeir verði undir fjöldaviðmiðum. Hvað varðar skólaíþróttir þá eru dagleg útivera með kennurum að koma í stað þeirra þessar tvær vikur eins og verið hefur. Vonir standa til að við tökum upp hefðbundnar stundatöflur að þessum tveimur vikum liðnum. Þá mun desember einnig bera þess merki að takmarkanir eru á skólastarfi þar sem jólaskemmtun verður rafræn og nemendur verða stigskiptir þegar kemur að uppbroti. Við höldum áfram að vinna þetta saman. Með okkar bestu kveðjum, Hólmfríður, Bylgja, Fríða og Margrét

Í ár fór lítið fyrir hátíðarhöldum í tilefni dags íslenskrar tungu eins og hefð er fyrir hér í Sandgerðisskóla. Við lesum þó og vinnum með tungumálið eins og okkur er framast unnt alla daga og ræddu kennarar um daginn við nemendur og upplestrar púltin fóru milli árganga.