Þemadagar – ferðalag í gegnum áratugina

Í vikunni fóru fram líflegir og fróðlegir þemadagar í Sandgerðisskóla þar sem nemendur og starfsfólk stigu í tímavél og fóru í ferðalag um áratugina – allt frá 1920 og til 2020. Þemað var „Áratugir í kvikmyndum, tónlist og sögu“ og var markmiðið að kynnast breytileika menningar, tísku og tækni með skemmtilegum og fjölbreyttum hætti.

Nemendum var skipt í hópa og fóru á milli stöðva þar sem hver stöð var tileinkuð ákveðnum áratug. Þar unnu þau með sögulegar staðreyndir, hlustuðu á tónlist, tóku þátt í dansi, klæddust tískufatnaði hvers tíma og spreyttu sig á leikjum, listum og handverki frá viðkomandi tímabili.

Áhersla var lögð á sköpun, samvinnu og að gera nám lifandi með því að tengja saman fræðslu og leik. Það var einstaklega gaman að sjá hve vel nemendur tileinkuðu sér andrúmsloft hvers tímabils og tóku þátt af mikilli gleði og áhuga.

Þemadagar sem þessir skapa frábær tækifæri til að efla félagsfærni, auka skilning á samfélaginu og gera nám eftirminnilegt. Við erum stolt af því hve vel til tókst og viljum þakka öllum sem komu að skipulagningu og framkvæmd – nemendum, kennurum og öllu starfsfólki skólans.

Myndaalbúm 1 - Myndaalbúm 2