Dagur íslenskrar tungu

Að tillögu menntamálaráðherra ákvað ríkisstjórn Íslands, haustið 1995, að 16. nóvember ár hvert, sem er fæðingardagur Jónasar Hallgrímssonar, yrði dagur íslenskrar tungu. Í framhaldi af því hefur menntamála- og menningarmálaráðuneytið árlega beitt sér fyrir sérstöku átaki í þágu íslensks máls og helgað þennan dag rækt við það. Með því móti beinist athygli þjóðarinnar að stöðu tungunnar, gildi hennar fyrir þjóðarvitund og alla menningu. Dagur íslenskrar tungu var fyrst haldinn hátíðlegur árið 1996. Fjölmargir aðilar lögðu hönd á plóg og efndu til viðburða af þessu tilefni. Má þar nefna fjölmiðla, skóla, stofnanir og félög. Mennta- og menningarmálaráðuneytið hélt hátíðarsamkomu og veitti þar í fyrsta sinn Verðlaun Jónasar Hallgrímssonar og sérstakar viðurkenningar fyrir störf í þágu íslenskunnar.Íslandsbanki veitti verðlaunaféð og hefur gert síðan.Dagur íslenskrar tungu hefur verið haldinn hátíðlegur með svipuðu sniði og sífellt fleiri aðilar taka virkan þátt í honum með ýmsu móti. Í Grunnskólanum í Sandgerði munu nemendur og starfsfólk gera íslenskri tungu hátt undir höfði með ýmsu móti mánudaginn, 17. nóvember. Nemendur munu m.a. fara á leikskólann og lesa upp fyrir nemendur þar, nemendur í 8. bekk afhenda nemendum í 7. bekk ræðupúlt Stóru upplestrarkeppninnar og þar með hefst þátttaka nýrra nemenda í þeirri ágætu keppni formlega.