Brúum bilið - Skólahópurinn kom í heimsókn til stjórnenda

Grunnskólinn í Sandgerði og Hjallastefnuleikskólinn Sólborg hafa átt í farsælu samstarfi undanfarin  ár. Elstu nemendur leikskólans koma í fjölmargar heimsóknir í grunnskólann ár hvert og nemendur úr 1. bekk fara í reglulegar heimsókn á leikskólann. Þessar gagnkvæmu heimsóknir fara alla jafna fram vikulega og er áherslan lögð á málörvun og lestrarundirbúning í grunnskólanum en valformið er nýtt í tímunum á leikskólanum. Auk þess taka nemendur leikskólans m.a. þátt í dagskrá í grunnskólanum á Sandgerðisdögum að hausti, koma á jólaskemmtun, taka þátt í árshátíð, eru með í þemaviku grunnskólans, nýta sér bókasafn skólans og eiga reglulega tíma í íþróttahúsinu auk þess sem boði hefur verið upp á sundnámskeið á vorin. Nemendur koma í heimsókn til skólastjórnenda á vorönn, prófa að vera í frímínútum með nemendum í 1. bekk og borða í matsal þegar því verður við komið. Þessu samstarfi fylgir einnig aukin samvinna kennara og skólastjórnenda, aukið upplýsingaflæði  er á milli skólanna og fleira sem auðveldar nemendum skil milli skólastiganna. Samstarfið gerir vinnuna á báðum skólastigum skilvirkari auk þess sem gagnkvæmur skilningur starfsfólks og ánægjulegt samstarf á sér stað. Þann 6. febrúar sl., á degi leikskólans, komu nemendur í árlega heimsókn til skólastjórnenda með kennurum sínum. Fanney, skólastjóri og Elín, aðstoðarskólastjóri tóku vel á móti hópnum og gengu með þeim um allan  skóla. Stjórnendur voru himinlifandi að fá að kynnast nýjum nemendum og krakkarnir stóðu sig frábærlega í heimsókninni. Myndir frá heimsókninni er að finna í myndasafni HÉR